Foto: Namangan viloyati hokimligi

Namanganda XI va XIV asrga oid noyob qilich, Baqtriya va Xitoy tangalari, Abu Nasr Forobiy qalamiga mansub nodir kitob topildi. Bu haqda Namangan viloyati hokimligi matbuot xizmati xabar berdi.

Maʼlum qilinishicha, Axsikent arxeologiya parki tarkibidagi Yangi Axsi majmuasidagi bebaho eksponatlar soni yana oʻn adadga ortgan. Mutaxassislar tomonidan XI asrga oidligi aytilayotgan qilich jangdan chiqqan holatda saqlangan. U qattiq poʻlatdan Axsikent temirchilari tomonidan yasalgan.

Ikkinchi aslaha esa XIV asrga oid boʻlib, uni Amir Temurning xos askarlari ishlatishgan. Baqtriya tangasi 475-600-yillarga oid. Xitoy tangasi esa XIX asrga oid boʻlib, uni tarixchi olim Sherali Qoʻldoshev batafsil tadqiq etgan.

«Tanganing oʻng tomonidagi 2 iyeroglif: Kashi / Kashi 喀什 — Qashqar. Chap tomonidagi 2 iyeroglif: san / san 参 — va jir / jin 金 – oltin, deb yozilgan. Tanganing tepa qismidagi 1 iyeroglif: guang / guang 光- yorugʻlik maʼnosini beradi Past qismidagi 1 iyeroglif: yuan / yuan 圓 yumaloq, yaʼni doira degan maʼnoni beradi. Tanganing oʻrtasidagi teshilgan joyidagi iyeroglifni oʻqish qiyin. Biroq, u shyuy 緒 iyeroglifini bildiryapti. Chunki Gaungshyuy / Guangxu 光緒 nomiga oʻxshayapti. U 1875 -1908-yillarda Xitoyni boshqargan», deydi Sherali Qoʻldoshev.

Uchta nodir kitob esa, ilm-maʼrifatga, falsafa va tarixga oid boʻlib, unda noyob ilm bitilgan.