“Omega-3” yogʻ kislotalarining dunyo boʻyicha yetishmasligi odamlar salomatligi uchun jiddiy muammo boʻlib bormoqda. “Case Western Reserve” universiteti olimlari olib borgan tadqiqotda bu moddalar yurak, miya, koʻz hujayralari va umumiy organizm faoliyati uchun zarurligi taʼkidlangan.

“Omega-3” moddasi asosan baliq va oʻsimlik mahsulotlarida boʻladi. Inson organizmi uni mustaqil ravishda yetarli miqdorda ishlab chiqara olmaydi. Shu sababli “Omega-3” oziq-ovqat yoki parhez qoʻshimchalari orqali olinishi lozim.

Tadqiqot muallifi Timoti Chiyeselski hozirgi oziq-ovqat tizimi “Omega-3”ni yetarli va toza manbalardan taʼminlashda ojizlik qilayotganini, bu esa kelajakda yanada ogʻir holatlarga olib kelishi mumkinligini bildirdi.

Tadqiqotda aytilishicha, dunyo aholisining 85 foizi “Omega-3”ni yetarlicha isteʼmol qilmayapti. Bu holatga dengiz suvlari isib borayotgani, haddan tashqari baliq ovlanishi va suv ifloslanishi sabab boʻlmoqda. Bular “Omega-3” bilan boy mahsulotlarga kirish imkoniyatini cheklagan deyiladi.

Mutaxassislar “Omega-3” miqdorini koʻpaytirish, shuningdek, uning singishiga halaqit beruvchi “Omega-6” yogʻlarini kamaytirish zarurligini bildirishdi. Chunki bu yurak xastaligi, saraton va boshqa yalligʻlanish bilan bogʻliq kasalliklarning oldini olishga yordam beradi.

Bugungi kunda zamonaviy sanoat mahsulotlarida “Omega-6” miqdori “Omega-3”dan 20 barobar koʻp. Ilgari bu moddalarning muvozanati saqlangan. Shuning uchun olimlar bu holat sogʻliq uchun xavf ekanini eslatib oʻtishdi.

“«Omega-3” tanqisligi shunchaki tibbiy masala emas, balki umumiy sogʻliq va atrof-muhit muammosidir», — deydi Chiyeselski. Mutaxassislar mazkur moddani isteʼmol qilishni koʻproq maslahatlar berishmoqda.