Milliy Tibbiyot Markazida Oʻzbekistonda birinchi bor noyob rekonstruktiv jarrohlik amaliyoti muvaffaqiyatli amalga oshirildi. Ushbu jarrohlik davomida chap kichik boldir suyagi (fibula) qon tomirlari bilan birga chap tirsak suyagidagi defektni toʻldirish uchun koʻchirib oʻtkazildi. Bu haqda Milliy tibbiyot markazi maʼlum qilgan.

Bemor Qozogʻiston Respublikasi fuqarosi boʻlib, unga malakali ortoped jarrohlar quyidagi bosqichlardan iborat jarrohlik amaliyotini oʻtkazdi. Birinchi navbatda, kichik boldir suyagi qon tomirlari bilan birga ehtiyotkorlik bilan olinib, uning hayotchanligi saqlab qolindi. Soʻngra, fibula suyagi chap tirsak suyagidagi defekt hududiga oʻrnatilib, plastinalar va vintlar yordamida osteosintez qilindi.

Amaliyot davomida tirsak arteriyasiga mikroxirurgik texnika yordamida anastomoz oʻrnatilib, qon aylanishi tiklandi. Shuningdek, bemorning tirsak funksiyasini tiklash maqsadida bukuvchi paylarning tenonizatsiyasi bajarildi. Ushbu kompleks jarayon bemorning normal harakat qobiliyatini tiklashga qaratildi.

Mazkur operatsiya tibbiy texnologiyalarning yuqori darajasi hamda Milliy Tibbiyot Markazi jarrohlarining professional tajribasi tufayli muvaffaqiyatli yakunlandi. Amaliyotdan keyin bemorning sogʻligi barqaror va reabilitatsiya jarayoni boshlangan. Bunday muvaffaqiyat Oʻzbekistonda yuqori texnologik jarrohlik imkoniyatlarining kengayib borayotganidan dalolatdir.

Milliy Tibbiyot Markazi oʻzining tibbiy xizmatlar sohasidagi yetakchi oʻrnini yana bir bor isbotladi. Ushbu muvaffaqiyat mamlakat tibbiyotining yangi pogʻonaga koʻtarilayotganini koʻrsatmoqda va bemorlar uchun yanada keng imkoniyatlar eshigini ochmoqda.