Foto: Prezident matbuot xizmati

Prezident matbuot kotibi Sherzod Asadov 8-dekabr — Oʻzbekiston Respublikasi Konstitutsiyasi kuni munosabati bilan tashkil etilgan tantanali tadbirda Prezident Shavkat Mirziyoyevning Oʻzbekiston xalqiga bayram tabrigini oʻqib eshittirdi.

“Hech shubhasiz, xalqimiz siyosiy-huquqiy tafakkuri hamda yuksak xohish-irodasining ifodasi boʻlgan Konstitutsiyamizda muhrlab qoʻyilgan qoida va tamoyillar Yangi Oʻzbekistonni barpo etishda barchamiz uchun beqiyos kuch-gʻayrat, ishonch va ilhom manbai boʻlib xizmat qilmoqda”, deyiladi davlatimiz rahbarining qutlovida.

Tabrikda xalq hokimiyatchiligi, vakillik demokratiyasi, Konstitutsiya va qonun ustuvorligi kabi konstitutsiyaviy prinsiplarga bundan buyon ham sodiq qolgan holda ushbu yoʻnalishdagi islohotlar yanada qatʼiy davom ettirilishi taʼkidlangan.

Konstitutsiyamizning har bir normasini davlat va jamiyat hayotida amaliy faoliyat mezoniga aylantirish zarurligi, ayniqsa, yoshlarimizga Asosiy qonunimizning mazmun-mohiyatini chuqur oʻrgatish, ularni konstitutsiyaviy qadriyatlar asosida yuksak ongli va vatanparvar fuqarolar etib tarbiyalash oldimizda turgan gʻoyat muhim vazifa ekani qayd etilgan.

Prezidentimiz yoʻllagan qutlovda, shuningdek, milliy mustaqilligimiz, gʻurur va iftixorimiz timsoli boʻlgan Konstitutsiyamiz sharaflanadigan ushbu quvonchli ayyom munosabati bilan xalqimizga eng ezgu tilaklar bildirilgan.