2025-yil 27-30-dekabr kunlari Matematika, Kimyo va Geografiya fanlaridan boʻlib oʻtgan milliy sertifikat imtihoni natijalari eʼlon qilindi. Bu haqida Bilimni baholash agentligi xabar berdi.

Talabgorlar oʻz natijalarini “my.gov.uz” saytining “Mening arizalarim” boʻlimi orqali bilishlari va sertifikatni elektron tarzda yuklab olishlari mumkin boʻladi.

Test natijalari xalqaro metodika – Rash modeli asosida hisoblangan boʻlib, talabgorlarga toʻplagan bali asosida quyidagicha sertifikat taqdim etiladi:

• 70 balldan yuqori ball — A+ daraja;
• 65 — 69,9 ball — A daraja;
• 60 — 64,9 ball — B+ daraja;
• 55 — 59,9 ball — B daraja;
• 50 — 54,9 ball — C+ daraja;
• 46 — 49,9 ball — C daraja.

Sertifikatga ega abituriyentlarga OTMlarning bakalavriatiga kirish test sinovlarida quyidagi tartibda ball beriladi:

• A+, A darajali sertifikat uchun — tegishli mutaxassislik fanidan maksimal ball;
• B+, B, C+, C darajali sertifikat uchun — tegishli mutaxassislik fanidan proporsional ball;
• A+, A, B+, B, C+, C darajali sertifikat uchun — tegishli majburiy fandan maksimal ball.

Akademik litseylarga kirish test sinovlarida sertifikati mavjud oʻquvchilarga tegishli fandan maksimal ball beriladi.

Sertifikatini yuklab oluvchi talabgorlar uchun muhim maʼlumot: Vazirlar Mahkamasining 2025-yil 30-dekabrdagi 840-son qarorining 1-ilovasiga muvofiq umumtaʼlim fanini bilish darajasi toʻgʻrisidagi sertifikat matnida oʻzgartirish kiritilgan.