Migratsiya agentligi Rossiya Federatsiyasida faoliyat yuritayotgan oʻzbekistonlik xalqaro yuk tashuvchi haydovchilar uchun muhim maʼlumotini eʼlon qildi. Bu haqida agentlikning Telegram-kanalida xabar berildi.

Unda aytilishicha, 2025-yil holatiga koʻra, Rossiyadagi xalqaro avtoyuk tashishlarning 25 foizga yaqini oʻzbekistonlik haydovchilar tomonidan amalga oshirilmoqda. Biroq migratsiya qoidalariga amal qilmaslik oqibatida koʻplab fuqarolar Rossiya ichki ishlar organlarining “kirishi man etilgan shaxslar” roʻyxatiga tushib qolmoqda.

Eʼlon qilingan xabarnomada har bir yuk avtomobili haydovchisi quyidagilarga qatʼiy rioya qilishi soʻralgan, jumladan:

• Chegaradan oʻtish vaqtida migratsion kartani aniq va toʻgʻri toʻldirish (maqsad grafasida — “turizm” emas, “slujebnaya” yoki “tranzit”ni koʻrsatish).
• Rossiyaga kirgandan soʻng 15 ish kuni mobaynida migratsiya roʻyxatiga qoʻyilishi lozim → bu odatda qabul qiluvchi tashkilot yoki ish beruvchi zimmasida boʻladi.
• 90/365 muddatini doimiy ravishda nazorat qilish (yaʼni 365 kunlik davrda 90 kundan ortiq qolib ketmaslik);
• Transport vositasi buzilishi yoki boshqa fors-major holat yuz bersa — albatta rasmiy akt yoki dalolatnoma olish;
• Har bir harakat — faqat rasmiy hujjat bilan asoslangan boʻlishi kerak;
• Takroriy huquqbuzarliklar → 3–10-yil muddatga Rossiyaga kirish taqiqini keltirib chiqaradi.

Shuningdek, agar xato sodir boʻlgan boʻlsa darhol Rossiya Federatsiyasi Ichki ishlar organlari (GUVM MVD RF)ga yozma ariza bilan murojaat qilish, hujjatlar orqali safarning haqiqiy maqsadini isbotlash hamda agar “kirishi taqiqlanganlar” roʻyxatiga tushgan boʻlsangiz — apellyatsiya berish orqali roʻyxatdan chiqarishni talab qilish mumkin boʻladi.

“Muammoli holatlarda Migratsiya agentligining Rossiya Federatsiyasidagi Vakolatxonasiga murojaat qiling. Murojaat uchun telefon +7 925 045 4744, manzil: Moskva, 1-y Kazachiy pereulok 11/2”, — deyiladi ogohlantirish xabarida.