Respublikaning turli hududlarida metan narxi oshgani aytilmoqda. Ekologiya vaziri maslahatchisi, jamoatchilik faoli Rasul Kusherbayev holatni 1-avgustdan metan gaz uchun belgilangan eng baland chakana narxning (3 750 soʻm) amal qilish muddati tugagani bilan izohladi.

Unga koʻra, 2024-yil 25-may kuni Vazirlar Mahkamasining metan gaz uchun belgilangan eng baland chakana narxning amal qilish muddatini uzaytirish haqidagi qarori qabul qilingan.

Mazkur qaror bilan 2024-yil 1-iyundan 1-avgustgacha avtomobillarga gaz toʻldirish shoxobchalarida bir kub metr metan gazning eng baland narxi 3750 soʻm qilib belgilangandi. Ushbu muddat tugagani sababli respublikaning turli hududlarida metan narxi 3950 soʻmdan 4250 soʻmgacha qimmatlashgan.

Shuningdek, propan narxida ham 5800-6200 soʻmgacha oshish kuzatilmoqda.

“Qizigʻi, birja savdolarida propanning narxi 30 kun ichida tonnasiga 6 023,8 ming soʻmdan 7 538,5 ming soʻmgacha qimmatlagan. Yaʼni toʻliq boʻlmagan 1 oyda propan narxi 25 foizdan koʻpga oshgan”, deb yozmoqda iqtisodchi Otabek Bakirov.

Voqealar fonida jurnalist Muhrim Aʼzamxoʻjayev masalaga Raqobat qoʻmitasi oydinlik kiritishi kerakligini bildirdi. Unga koʻra, Qoʻmita nima sababdan isteʼmolchilar orasida lozim darajada targʻibot-tushuntirish ishlari olib borilmagani boʻyicha surishtiruv olib borishi kerak.