Markaziy bank 10 ta bankka nisbatan jarima sanksiyasi qoʻlladi. Bu haqda regulyator matbuot xizmati xabar berdi.

Qayd etilishicha, Markaziy bankning Bank nazorati qoʻmitasi tomonidan 2025-yilning yanvar oyidagi yigʻilishlari sarhisob qilingan. Unga koʻra, jami yigʻilishlarda 44 ta masala koʻrib chiqilgan.

Taʼkidlanishicha, bu galgi majlisda roʻyxatga olish va ruxsat berish yoʻnalishida 36 ta masala koʻrilgan. Bundan tashqari, kredit tashkilotlarining moliyaviy holatiga oid 8 ta masala – Markaziy bankning koʻrsatmalari va prudensial meʼyorlari talablarining bajarilishi, tijorat banklari, mikromoliya tashkiloti va toʻlov tashkilotlarida oʻtkazilgan oʻrganish hamda “Jismoniy va yuridik shaxslarning murojaatlari toʻgʻrisida”gi qonun talablariga rioya qilinishi ham muhokama qilingan.

Markaziy bank tomonidan oʻtkazilgan oʻrganishlar natijasida aniqlangan kamchiliklar, jumladan, Markaziy bankning koʻrsatmalari va qonunchilik talablariga rioya qilmagani uchun 1 ta toʻlov tizimi operatori chora va sanksiyalar qoʻllanishi toʻgʻrisida ogohlantirilgan.

Shuningdek, amaldagi qonunchilik, Markaziy bank tomonidan oʻtkazilgan oʻrganish va inspeksiya tekshiruvlari davomida aniqlangan qoidabuzarliklar uchun 10 ta bankka nisbatan jarima sanksiyasi qoʻllanilgan.