Marhamatda yirik logistika markazi qurilmoqda

15:59 30 Sentyabr 2025 Jamiyat
498 0

Mamlakatimizda logistika markazlarining ahamiyati tobora ortib bormoqda. Chunki ular yuk tashish, mahsulotlarni saqlash va tarqatish tizimini zamonaviy asosda yoʻlga qoʻyishga xizmat qiladi. Shu maqsadda Marhamatda “Ershi modern invest” masʼuliyati cheklangan jamiyati tomonidan zamonaviy logistika markazi qurilishi jadal surʼatlarda olib borilmoqda.

— Markaz ishga tushirilgandan soʻng 300 ta yangi ish oʻrni yaratilishi rejalashtirilgan, — deydi Andijon viloyati hokimligi masʼul xodimi Rustamjon Eshonov. — Shu bilan birga, 4,4 million dollar miqdorida xorijiy investitsiya kiritilishi belgilangani mazkur yirik infratuzilma obyektining ahamiyatini yanada oshirmoqda.

Qurilayotgan logistika markazi kelgusida nafaqat ish oʻrinlari yaratilishi, balki yoshlarning chet tillarini oʻrganishi va axborot texnologiyalariga qiziqishini kuchaytirishda ham muhim omilga aylanishi kutilmoqda. Chunki bunday markazlarda xorijiy sheriklar bilan hamkorlikda faoliyat olib boriladi, zamonaviy dasturiy taʼminotlar, raqamli boshqaruv tizimlari qoʻllaniladi. Bu esa yoshlardan til bilish va IT sohasida zamonaviy koʻnikmalarga ega boʻlishni talab qiladi hamda ularning bu yoʻnalishlarga boʻlgan intilishini yanada kuchaytiradi.

Saminjon HUSANOV

“Xalq soʻzi”.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?