Boyovut tumanidagi Madaniyat, Uchturgon, Olmazor mahallalarida istiqomat qilayotgan fuqarolar bir kunda 5 ming metrdan ziyod masofaga yurish uchun shu mahallalar hududidan oʻtgan yoʻlakdan ikki marta borib qaytsa bas, ushbu rejasi ortigʻi bilan bajariladi.

Negaki, mazkur “salomatlik yoʻlagi”ning uzunligi 1.6 kilometr boʻlib, tuman markazidan Olmazor mahallasigacha choʻzilgan. Eʼtiborlisi, uning yonidan katta ariq oqib oʻtadi va bu manzara kishiga oʻzgacha zavq bagʻishlashi barobarida atrof-javonib havosining musaffoligi hamda moʻtadilligini ham taʼminlaydi. Yoʻlak boʻylab koʻzi ojiz shaxslarning ravon harakatlanishi uchun boʻrtma yoʻlkoʻrsatkich belgilari bor maxsus qoplamalar ham yotqizilgan.

— Salomatlikni mustahkamlash maqsadida piyoda yurish mashqlarini bajarish hamda sayr qilib maroqli dam olishga qulay imkon yaratish uchun istirohat bogʻlaridagi sharoitni yanada yaxshilashga ham katta eʼtibor berilyapti, — deydi Boyovut tumani hokimi oʻrinbosari Komiljon Abdaliyev. — Markaz va Navroʻz mahallasida joylashgan shunday maskanlarda obodonlashtirish amalga oshirildi. Tuman markazidagi istirohat parkida olib borilayotgan bunyodkorlik ishlari esa tez orada yakunlanadi.

Ahmadali ShERNAZAROV

“Xalq soʻzi”.