Gap Gʻijduvon tumanidagi “Gulistonobod” mahallasi haqida bormoqda. Bu yerda butun boshli markaz barpo etilib, foydalanishga topshirildi.

Uch qavatli zamonaviy binoda mahalla “yettiligi” ning samarali ishlashi uchun barcha shart-sharoitlar yaratilgan. Kutubxona joylashgan. Ayollar uchun “Goʻzallik saloni”, erkaklar sartaroshxonasi, yoshlarning xorijiy tilni oʻrganishlari uchun oʻquv kurslari, tikuvchilik va qandolat sexi, fitnes zal, savdo doʻkoni – bularning barchasi hududda istiqomat qiluvchi aholining tashvishini yengillashtiradi, fuqarolar, xususan, yoshlarning qimmatli vaqtni mazmunli va foydali oʻtkazishiga imkon beradi.

— Bu markaz mahallaga uzukka koʻz qoʻygandek yarashib tushdi, — deydi maskanning foydalanishga topshirilishi munosabati bilan oʻtkazilgan marosim ishtirokchisi, xalq deputatlari tuman Kengashi deputati M. Rahmatova. — Shu kabi inshootlar yurtimizda “Inson qadri uchun” tamoyilining hayotga izchil tatbiq etilayotganidan dalolat beradi.

Mahallaning koʻrkam markazi “Islom taraqqiyot banki” tomonidan ajratilgan 4 milliard 500 million soʻm miqdoridagi mablagʻ evaziga barpo etildi. Eʼtiborlisi, u tumanda keyingi bir oyda foydalanishga topshirilgan ikkinchi shunday shinam inshootdir. Sal avvalroq “Jovgari” mahallasi ham yangi binoga ega boʻlgandi.

Istam IBROHIMOV

“Xalq soʻzi”.