“Le Parisien” gazetasi xabariga koʻra, Luvr muzeyini oʻgʻirlash amaliyotining ortida chet ellik buyurtmachi turgan boʻlishi ehtimol qilinmoqda.

Nashr maʼlumotlariga koʻra, qoʻlga olingan ikki nafar ayblanuvchi soʻroq davomida jinoiy guruhlar tomonidan berilgan koʻrsatmalar asosida harakat qilganini tan olgan. Ulardan biri buyurtmachilar orasida chet elda yashovchi shaxs ham boʻlganini aytgan, ammo uning ismini ochiqlamagan.

Ayblanuvchilardan yana biri Luvr muzeyiga kirganini bilmaganini bildirgan. U oʻz bayonotida gapirar ekan, “men shunchaki shisha piramida yonida joylashgan bir muzeyga kirganman, deb oʻyladim”, degan.

Maʼlumotlarga koʻra, gumondorlar orasida ijtimoiy tarmoqlarda “Doudou Cross Bitume” taxallusi bilan mashhur boʻlgan, mototsiklda tryuklar bajaruvchi bloger ham bor. Tergovchilar uni bevosita muzey binosiga kirgan ikki nafar shaxsdan biri sifatida koʻrmoqda.

Hozirgi paytda toʻrt nafar gumondor hibsda saqlanmoqda va ularga rasman ayblov eʼlon qilingan. Ayblanuvchilardan ikkovi muzeydagi vitrinalarni buzgan, yana biri esa motorollerda oyna ostida ularni kutib turgani aytilmoqda.