VATAN YAGONA

Paydo boʻlibdiki, bu koʻhna dunyo
Zaminu falakda yangrar bir nido,
Olam tuslanar,
U turlanmas aslo — 
Vatan yagonadir,
Vatan yagona!

U — sening mujgoning, qarogʻing, koʻzing,
U — orzu-armoning, u — aytar soʻzing,
Iymoning, vijdoning, u — sening oʻzing,
Bobong — u, momong — u, u — munis ona —
Vatan yagonadir,
Vatan yagona!

Yonarmi piligi chirigan chiroq?
Yashnarmi bandidan uzilgan yaproq?
Faqat kindik qoni toʻkilgan tuproq
Insonga muhtasham qoʻrgʻon, koshona —
Vatan yagonadir,
Vatan yagona!

Kim ikki Vatanni qilibdi daʼvo,
Ul kas bevatandir, u — vatangado!
Ishonib boʻlmaydi ul kasga, illo —
Vatan yagonadir,
Vatan yagona!

Qoʻsh kemani tutgan xor boʻlar bir kun,
Bir qatra mehrga zor boʻlar bir kun,
Alangaga qoʻngan qor boʻlar bir kun,
Vatanim, joningga jonim qurbon-a! —
Vatan yagonadir,
Vatan yagona!

Yagona yurt deya olurmiz nafas,
Shu yurtga fidodir bor orzu-havas,
Yurtim!
Qaysi gʻanim senga qilsa qasd,
Unga mozor boʻlgay har bir ostona — 
Vatan yagonadir,
Vatan yagona!

***

XALQING UCHUN

Asqartogʻdan oshsin, desang ovozlarim,

Ummonlarday toshsin desang shoʻx sozlarim,

Shamollarday shoshsin desang parvozlarim —

Bilagingda boʻlsa qancha gʻayrat, kuching,

Vatan uchun sarfla uni, Vatan uchun.

Na ilojki, koʻplar sendan oʻzib ketdi,

Boʻz yigitlar, boʻztoʻrgʻayday toʻzib ketdi,

Gullaringni, eh, kim-kimlar uzib ketdi —

Bilagingda boʻlsa qancha qudrat, kuching,

Vatan uchun sarfla endi, Vatan uchun.

Har qishlogʻu har ovuling Manas boʻlsin,

Koʻrar koʻzga - koʻrgan joyi havas boʻlsin,

Qumrilaru bulbullaring sarmast boʻlsin —

Bilagingda boʻlsa qancha qudrat, kuching,

Xalqing uchun sarfla uni, xalqing uchun.

Oq charloqlar qaytib kelsin Moʻynoqlarga,

Orol qoʻshiq aytib kelsin qirgʻoqlarga,

Mehringni ber soʻqmoqlaru qiyoqlarga —

Bilagingda boʻlsa qancha qudrat, kuching,

Xalqing uchun sarfla uni, xalqing uchun.

Chiqmoqdasan yana jahon minbariga,

Nomingni yoz sayyoramiz mehvariga,

Aylan, aylan, Oʻzbekiston zargariga —

Bilagingda boʻlsa qancha qudrat, kuching,

Xalqing uchun sarfla uni, xalqing uchun.

Oʻzbekzamin javohirga kondir bugun,

Millat shaʼni hamma uchun shondir bugun,

Oʻzingni ham, oʻzgani ham yondir bugun —

Bilagingda boʻlsa qancha qudrat, kuching,

Sarfla uni Vatan, millat, xalqing uchun,

Xalqing uchun sarfla uni, xalqing uchun.

Abdusaid KOʻCHIMOV