ВАТАН ЯГОНА

Пайдо бўлибдики, бу кўҳна дунё
Замину фалакда янграр бир нидо,
Олам тусланар,
У турланмас асло — 
Ватан ягонадир,
Ватан ягона!

У — сенинг мужгонинг, қароғинг, кўзинг,
У — орзу-армонинг, у — айтар сўзинг,
Иймонинг, виждонинг, у — сенинг ўзинг,
Бобонг — у, момонг — у, у — мунис она —
Ватан ягонадир,
Ватан ягона!

Ёнарми пилиги чириган чироқ?
Яшнарми бандидан узилган япроқ?
Фақат киндик қони тўкилган тупроқ
Инсонга муҳташам қўрғон, кошона —
Ватан ягонадир,
Ватан ягона!

Ким икки Ватанни қилибди даъво,
Ул кас беватандир, у — ватангадо!
Ишониб бўлмайди ул касга, илло —
Ватан ягонадир,
Ватан ягона!

Қўш кемани тутган хор бўлар бир кун,
Бир қатра меҳрга зор бўлар бир кун,
Алангага қўнган қор бўлар бир кун,
Ватаним, жонингга жоним қурбон-а! —
Ватан ягонадир,
Ватан ягона!

Ягона юрт дея олурмиз нафас,
Шу юртга фидодир бор орзу-ҳавас,
Юртим!
Қайси ғаним сенга қилса қасд,
Унга мозор бўлгай ҳар бир остона — 
Ватан ягонадир,
Ватан ягона!

***

ХАЛҚИНГ УЧУН

Асқартоғдан ошсин, десанг овозларим,

Уммонлардай тошсин десанг шўх созларим,

Шамоллардай шошсин десанг парвозларим —

Билагингда бўлса қанча ғайрат, кучинг,

Ватан учун сарфла уни, Ватан учун.

На иложки, кўплар сендан ўзиб кетди,

Бўз йигитлар, бўзтўрғайдай тўзиб кетди,

Гулларингни, эҳ, ким-кимлар узиб кетди —

Билагингда бўлса қанча қудрат, кучинг,

Ватан учун сарфла энди, Ватан учун.

Ҳар қишлоғу ҳар овулинг Манас бўлсин,

Кўрар кўзга - кўрган жойи ҳавас бўлсин,

Қумрилару булбулларинг сармаст бўлсин —

Билагингда бўлса қанча қудрат, кучинг,

Халқинг учун сарфла уни, халқинг учун.

Оқ чарлоқлар қайтиб келсин Мўйноқларга,

Орол қўшиқ айтиб келсин қирғоқларга,

Меҳрингни бер сўқмоқлару қиёқларга —

Билагингда бўлса қанча қудрат, кучинг,

Халқинг учун сарфла уни, халқинг учун.

Чиқмоқдасан яна жаҳон минбарига,

Номингни ёз сайёрамиз меҳварига,

Айлан, айлан, Ўзбекистон заргарига —

Билагингда бўлса қанча қудрат, кучинг,

Халқинг учун сарфла уни, халқинг учун.

Ўзбекзамин жавоҳирга кондир бугун,

Миллат шаъни ҳамма учун шондир бугун,

Ўзингни ҳам, ўзгани ҳам ёндир бугун —

Билагингда бўлса қанча қудрат, кучинг,

Сарфла уни Ватан, миллат, халқинг учун,

Халқинг учун сарфла уни, халқинг учун.

Абдусаид КЎЧИМОВ