Kecha «Oʻzbekkino» Milliy agentligida “Yosh kinematograflar festivali” boʻlib oʻtdi. Unda Bosh vazirning ijtimoiy rivojlantirish masalalari boʻyicha oʻrinbosari Behzod Musayev nutq soʻzladi. Bu haqda agentlik matbuot xizmati xabar berdi.

"Kino tomoshabin uchun yaratilishi kerak, — dedi B.Musayev. — Unga avvalo tomoshabinlar baho beradi. Kinoteatr, televideniye yoki striming platformali orqali boʻladimi, farqi yoʻq, u auditoriyaning mehrini qozonishi zarur. Uning asosiy maqsadi shunga qurilishi lozim.

Bugungi gʻoliblarni tabriklayman. «Oʻzbekkino»ning yoshlarga shunday eʼtibor koʻrsatayotgani, sohaga jalb qilayotganligi, sharoit yaratayotgani quvonarli hol. Yoshlarning istak va irodalarini yoshlarning oʻzidan yaxshiroq anglash qiyin. Umid qilamanki, ushbu yoshlar oʻzbek kinosining buyuk namoyondalariga munosib izdosh boʻlib, oʻzbek xalqining mehriga sazovor boʻladi".

Festivalda Oʻzbekiston Respublikasi Yoshlar ishlari agentligi direktori Alisher Saʼdullayev, «Oʻzbekkino» Milliy agentligi direktori Firdavs Abduxoliqovlar ham soʻzga chiqib, barcha yosh kinoijodkorlarni tabriklashdi. Tadbirda jurnalistlar hamda jamoatchilik faollari ham ishtirok etdi. 

Tadbir doirasida «Oʻzbekkino» Milliy agentligi bu yil birinchi bora tashkil etilayotgan “Debyut” yosh kinoijodkorlarning ssenariylar tanlovi gʻoliblarini taqdirladi hamda bu tanlov muntazam ravishda har yili oʻtkazilishi maʼlum qilindi.

Shuningdek, «Oʻzbekkino» Milliy agentligi tomonidan Yaponiyaning “DigiCon6 ASIA” kinofestivalida ishtirok etishga muvaffaq boʻlgan yoshlarni taqdirlash marosimi ham oʻtkazildi. Shuni aytib oʻtish lozimki, Yaponiyaning “DigiCon6 ASIA” kino tadbiriga filmlarni yuborish va boshqa xarajatlar «Oʻzbekkino» Milliy agentligi byudjet mablagʻlari hisobidan qoplanadi.

Yana ushbu kun «Oʻzbekkino» Milliy agentligida Butunrossiya davlat kinematografiya instituti (VGIK)ga qabul qilingan 7 nafar oʻzbekistonlik talabalarga diplom va esdalik sovgʻalari topshirildi. Eʼtiborli jihati, bunday tadbir mustaqil Oʻzbekiston kinematografiyasi tarixida ilk bora amalga oshirilmoqda.

Yoshlar festivali davomida yosh kinoijodkorlar bilan seminar-treninglar oʻtkazildi. Estrada yulduzlarining chiqishlari, shoular va qisqa metrajli filmlar namoyishlari tashkil etildi.