Kiberhujum tufayli Yevropadagi bir qator aeroportlar faoliyatida toʻxtalishlar kuzatilmoqda. Bu haqida “Bild” nashri xabar berdi.

Unda aytilishicha, kecha, 19-sentyabr kuni tunda tashqi xizmat koʻrsatuvchi provayderga qilingan kiberhujum butun Yevropa aeroportlarida sezilarli uzilishlarga sabab boʻlgan. Aeroport maʼmuriyatining maʼlum qilishicha, Berlinda xavfsizlik nuqtayi nazaridan tizimlarga kirish butunlay oʻchirib qoʻyilgan. Oqibatda uzun navbatlar, kechikishlar va reyslar bekor qilingan.

Berlin aeroporti mazkur hujumning bevosita nishoni boʻlmagan boʻlsada, aeroportdagi yoʻlovchilarga koʻplab noqulayliklar yuzaga kelgan. Jumladan, roʻyxatdan oʻtish qoʻlda amalga oshirilgan. Yoʻlovchilar soatlab kutishiga toʻgʻri kelgan. Shunga oʻxshash yana bir holat Bryusselda ham yuz bergan. Unda rasmiylar aeroport faoliyatida uzilishlar kuzatilayotgani haqida ogohlantirib, yoʻlovchilarga aeroportga oldinroq yetib kelishni tavsiya qilgan.

Londonning Hitrou aeroporti ham muammolar haqida maʼlum qilgan va ularni “texnik nosozlik” deb atagan. Ayni paytda koʻplab Yevropa aviatsiya markazlarida ishlatiladigan servis-provayder tizimlarni tiklash ishlari boshlab yuborilgan.