Xushxabar: qilichbozimiz Sherzod Mamutov Olimpiadaga yoʼllanma oldi

20:53 25 Aprel 2021 Sport
1408 0

"Hasan PAYDO"

Poytaxtimizdagi Gimnastikaga ixtisoslashtirilgan Olimpiya zaxiralari bolalar-oʼsmirlar sport maktabida qilichbozlik boʼyicha Tokio-2020 Olimpiada oʼyinlariga litsenzion turnir start oldi. Quvonarlisi, musobaqa terma jamoamiz uchun muvaffaqiyatli boshlandi. Bundan biroz avval xalqaro turnirning sablya yoʼnalishida hamyurtimiz Sherzod Mamutov Tokio Olimpiadasiga yoʼllanmani qoʼlga kiritdi.

Dastlab guruh bosqichidan muvaffaqiyatli oʼtib olgan Sherzod chorak finalda Singapur, yarim finalda qozogʼistonlik raqibini magʼlubiyatga uchratdi. Olimpiada yoʼllanmasi uchun kechgan hal qiluvchi final bahsida hamyurtimizga Gonkong terma jamoasi vakili Xo Tin Lov raqiblik qildi. Qizgʼin kechgan bahsda Sherzod Mamutov 15:7 hisobida gʼalaba qozondi.

Shu tariqa yosh sablyachimiz Tokio-2020 Olimpiya oʼyinlari yoʼllanmasini qoʼlga kiritdi. Bu qilichbozlik boʼyicha Oʼzbekiston terma jamoasining Olimpiada oʼyinlariga ikkinchi litsenziyasidir. Bungacha terma jamoamiz aʼzosi Malika Hakimova ham Tokio-2020ga yoʼllanma olgandi. 

Eʼtiborga molik yana bir jihat, Sherzod Mamutov Oʼzbekiston qilichbozligi tarixida sablya yoʼnalishida Olimpiadaga yoʼllanma olgan ilk sportchimizga aylandi.

Fotolavhalarni ko'rish

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?