Saminjon HUSANOV/“Xalq soʻzi”. Respublikamizda davlatimiz rahbari tashabbusi bilan elektr energiyasi taʼminotidagi uzluksizlikni yoʻlga qoʻyish, isteʼmolchilarga sifatli xizmat koʻrsatish, buning uchun gidroenergetika sohasini yangi bosqichga olib chiqish boʻyicha samarali ishlar amalga oshirilmoqda.

— Xoʻjaobod tumanidagi “Ipakchi” MFY hududidan oqib oʻtuvchi «Katta Fargʻona” kanali boʻyida “XJY POWER PTE ANDIJAN” MCHJ tomonidan qiymati 5 mln. AQSH dollariga teng gidroelektr stansiyasi qurilishi ishlari davom etyapti, — deydi viloyat hokimligi xodimi Rustamjon Eshonov. — Xorijiy investorlar ishtirokidagi ushbu loyiha foydalanishga topshirilgach, bir yilda 1,8 MVt elektr energiyasi ishlab chiqariladi. Bu bilan nafaqat, aholining balki, ijtimoiy-iqtisodiy soha obyektlarining ham elektr taʼminotiga boʻlgan ehtiyoji toʻliq qondiriladi.

Bunday istiqbolli loyihalarga viloyatning boshqa hududlarida ham kirishilgan. Kelgusida 536 ta GES, mikro GESlar qurilishi rejalashtirilgan.