Foto: Jaloliddin Rajabov / “Xalq soʻzi”

Har qaysi xalqning azaliy tarixi va madaniyati eng avvalo uning ogʻzaki ijodi folklor sanʼatida, doston va eposlarida mujassam topgan boʻlib, ular millatning oʻzligini anglash, uning oʻziga xos milliy qadriyatlari va anʼanalarini saqlash va rivojlantirishda bebaho manba hisoblanadi.

Xalq ogʻzaki ijodiyotining eng qadimiy turlaridan boʻlgan baxshichilik sanʼati yuksak gumanizm gʻoyalarini, tinchlik va doʻstlik, adolat va haqiqat kabi ezgu fazilatlarni mahorat bilan tarannum etadi. Shu bois ham, baxshi, oqin va jirovlar azaldan xalq qalbining kuychilari, turli millat va elatlarni birlashtiradigan olijanob insonlar sifatida ardoqlab kelinadi.

Mamlakatimizda boshqa sanʼat turlari kabi baxshichilik sanʼatiga ham alohida eʼtibor qaratilmoqda.

Buni Oʻzbekiston Respublikasi Prezidentining 2018-yil 1-noyabrdagi “Xalqaro baxshichilik sanʼati festivalini oʻtkazish toʻgʻrisida”gi qarori asosida har ikki yilda bir marta oʻtkazilayotgan Xalqaro baxshichilik sanʼati festivali misolida ham koʻrish mumkin. Festivalning qamrovi yildan yilga kengayib bormoqda.

Oʻzbekiston Prezidenti Shavkat Mirziyoyevning IV Xalqaro baxshichilik festivali ishtirokchilariga tabrigini Prezident maslahatchisi Odil Abdurahmonov oʻqib eshittirdi.

Joriy yil 26-28-aprel kunlari oʻtadigan festivalda dunyoning 40 dan ortiq davlatlaridan taniqli baxshilar ishtirok etishmoqda.

Xiva shahrida IV Xalqaro baxshichilik sanʼati festivalining tantanali ochilish marosimi tadbir sanʼat ustalari va baxshi, oqin, jirovlarning konsert dasturi bilan yakunlandi.

Otabek SAIDAHMADOV
“Xalq soʻzi”