Buxoro shahrida 23 - 24-iyun kunlari boʻlib oʻtadigan “Barqaror rivojlanish maqsadlariga erishishda parlamentlararo global hamkorlik” mavzusidagi xalqaro forum yurtimiz aholisi, xususan, yoshlarning katta qiziqishiga sabab boʻlmoqda. Mazkur nufuzli tadbir oldidan Buxoro shahrida yoshlar ishtirokida aksiya tashkil etilgani fikrimiz dalilidir.

Koʻhna shaharning Yoshlar markazida oʻtkazilgan aksiyada Oʻzbekiston Respublikasi Oliy Majlisi palatalari qoʻshma qarori asosida uyushtirilayotgan xalqaro forumning mazmun-mohiyati haqida fikr- mulohaza yuritildi. Unda soʻz olgan viloyat hokimi B. Zaripov yoshlarimiz har jabhada faol va tashabbuskor ekanliklarini, yigit-qizlarga oʻz imkoniyatlari, salohiyatlarini yuzaga chiqarishlari uchun zarur shart- sharoitlar yaratib berish davlatimizning ustuvor siyosatiga aylanganini taʼkidladi.Xalqaro forumda ham navqiron avlodning kelajagi bilan bevosita bogʻliq dolzarb masalalar muhokama qilinishi koʻzda tutilgan.Bunday forumning ilk bor mamlakatimizda, Buxoroda oʻtkazilishi ham alohida ahamiyatga egadir.

Aksiya doirasida koʻngilochar tadbirlar tashkil etildi. Yoshlar oʻzlarini qiziqtirgan savollarga atroflicha javob oldilar. Faol oʻgʻil-qizlarga oʻzbek va jahon adabiyoti namoyondalarining sara asarlaridan namunalar tuhfa qilindi.

Istam IBROHIMOV,
(“Xalq soʻzi”)