Foto: OʻFA

Xabaringiz bor, kecha, 18-noyabr kuni Oʻzbekiston milliy terma jamoasi BAAda oʻtgan “Al Ain International Cup” tijoriy turnirida gʻoliblikni qoʻlga kiritdi. Fabio Kannavaro boshchiligidagi jamoa musobaqada 2 ta oʻyin oʻtkazib, ularning har ikkalasida gʻalabaga erishdi.

Jamoasi bosh murabbiyi Fabio Kannavaro noyabr oyidagi yigʻin yakunlari haqida fikrlarini bildirib oʻtdi.

“Bizning oldimizda katta maqsad turibdi — 2026-yilgi Jahon chempionatiga puxta, tayyorlangan va toʻliq xabardor holda yetib borish. Shu nuqtayi nazardan, BAAda oʻtkazilgan Al Ain xalqaro kubogida gʻalaba qozongan jamoam bilan faxrlanaman. FIFA reytingida bizdan yuqorida joylashgan Misr va Eron kabi kuchli raqiblar ustidan erishilgan gʻalabalar muhim tajriba boʻldi.

Safar endi boshlanmoqda, biroq biz toʻgʻri yoʻldamiz. Qadamma-qadam, har kuni fidoyilik bilan ishlashni davom ettirishimiz zarur. Faqat shunda biz barqaror va mustahkam jamoa tizimini shakllantira olamiz.

Biz — bir jamoamiz. Oʻzbekiston xalqi. Keling, birgalikda orzu qilaylik”, deydi Oʻzbekiston milliy terma jamoasi bosh murabbiyi.