Togʻga sayr qilish uchun borib, yoʻldan adashib qolgan fuqarolarga qutqaruvchilar yordam koʻrsatdi.

Yoz mavsumida fuqarolarning turli dam olish maskanlariga, togʻli hududlarga va suv boʻylariga hordiq chiqarish maqsadida borish holatlari koʻpayadi. Lekin baʼzi hollarda bu dam olish koʻngilsizlik bilan yakunlanmoqda.

3-iyun kuni soat 15:10 da ham “Katta chimyon” togʻiga sayr qilish maqsadida borib, yoʻldan adashib qolishi natijasida togʻdan tusholmay qolgan fuqaro Toshkent viloyati FVBga bu haqda xabar qilgan.

Xabarga asosan, Chimyon yongʻin-qutqaruv otryadidan bir guruh qutqaruvchilar zudlik bilan aytilgan manzilga yetib borib, fuqaro togʻdan xavfsiz hududga olib tushilgan.

Boshqa bir holatda esa 31-may kuni ushbu togʻga ikki nafar fuqarolar sayr qilish maqsadida borib, yoʻldan adashib qolganligi toʻgʻrisida Favqulodda vaziyatlar boshqarmasiga yordam soʻrab murojaat qilgan.

Ular ham qutqaruvchilar tomonidan dengiz sathidan taxminan 3400 metr balandlikdan xavfsiz hududga olib tushildi. Ikkala holatda ham tan jarohatlari olganlar yoʻq.

Taʼkidlash joiz, togʻli hududlarga sayohat qilishdan oldin fuqarolarga har doim oldindan reja tuzish, ob-havo sharoitini hisobga olish, tajribali yoʻlboshchi bilan yurish va kerakli anjomlar bilan taʼminlanish tavsiya etiladi.