Kelgusi haftada Fransiyaning Parij shahrida karate boʻyicha Tokio-2020 Olimpiadasiga yoʻllanma beruvchi soʻnggi musobaqa oʻtkaziladi. Unda mamlakatimiz sportchilari ham oʻz omadlarini sinab koʻrishadi.

Shu maqsadda Oʻzbekiston karate WKF terma jamoasi aʼzolari Toshkent —Moskva — Parij yoʻnalishi orqali “modalar Vatani”ga joʻnab ketishdi.

Eslatib oʻtamiz, hozircha karatechilarimiz Yaponiyada boʻlib oʻtadigan XXXII yozgi Olimpiya oʻyinlariga bironta ham yoʻllanma olishmagan va Parijdagi kvalifikatsion turnir bu yoʻlda ular uchun soʻnggi imkoniyat sanaladi.

Parijdagi musobaqaga Oʻzbekiston delegatsiyasi quyidagi tarkibda joʻnab ketdi:

Bahodir Mamatnazarov – delegatsiya rahbari,

Dilnoza Bakirova – bosh trener,

Oʻktam Bekpoʻlatov – trener,

Sadriddin Saymatov (-67 kg) – sportchi,

Dostonbek Otabolayev (-75 kg) – sportchi,

Jahonshox Ibrohimov (+75 kg) – sportchi,

Bahriniso Boboyeva (-55 kg) – sportchi,

Sevinch Rahimova (-61 kg) – sportchi,

Dildora Aliqulova (+61 kg) – sportchi,

Bahriddin Ahmedov – shifokor,

Husan Turgʻunov – massajchi.

Shuningdek, musobaqada ikki nafar hakamimiz ham ishtirok etadi. Bular – Azizbek Boʻriyev hamda Alisher Qilichev.

Umid qilamizki, musobaqa yakunida Tokio-2020 Olimpiadasiga qoʻlga kiritilgan litsenziyalarimiz soni ortadi.