Falastin Sogʻliqni saqlash vazirligining maʼlum qilishicha, Isroil askarlari va harbiy samolyotlari bosib olingan Gʻarbiy Sohildagi Tulkarim va Nur Shams qochqinlar lagerlariga uyushtirgan hujumlarida kamida sakkiz falastinlik, jumladan, ikki ayol va bir oʻsmir halok boʻldi. Oʻsmir koʻkrak va qorin qismiga oʻq tegishi oqibatida, ikki ayol esa dron hujumlarida halok boʻlgan.

Isroil harbiylari Tulkarimdagi operatsiyasida bir falastinlikni oʻldirganini, yana 18 kishini hibsga olganini va oʻnlab qurollarni musodara qilganini bildirdi. Mamlakat askarlari Isroil samolyoti Nur Shams qochqinlar lageriga zarba berganini ham tasdiqladi.

Isroil armiyasi chorshanba kuni ertalab falastinlik jangchilar tomonidan oʻrnatilgan va Isroilning Tulkarimga reydi paytida portlatilgan qoʻlbola portlovchi moslama Isroilning Menashe brigadasi qoʻmondoni polkovnik Ayub Kayuf ketayotgan mashinaga borib tushganligini maʼlum qildi.

Shuningdek, maʼlum boʻlishicha, Isroil harbiy buldozerlari seshanba kuni Tulkarimga uyushtirilgan reyd davomida bir qator infratuzilmalarni, jumladan, uylar, doʻkonlar, as-Salom masjidi devorlarining bir qismini va lagerning suv tarmogʻining bir qismini buzib tashlagan.