Isroil harbiy-dengiz kuchlari Gʻazo sektoriga yoʻl olgan “yordam flotiliyasi”ning bir nechta kemasini toʻxtatdi. Bu haqda DW nashri xabar berdi.

Isroil TIV bayonotida keltirilishicha, kema va yoʻlovchilarga zarar yetmagan, yoʻlovchilar Isroil portlariga olib borilgan. Qayd etilishicha, yoʻlovchilar orasida shvetsiyalik ekofaol Greta Tunberg ham boʻlgan. Isroil tomoni Tunberg va uning hamrohlari sogʻ-salomat ekanini maʼlum qildi.

Flotiliya avgust oxirida Barselonadan dengizga chiqqan. Unda 40 dan ortiq kema va parusli qayiq bor edi, umumiy ishtirokchi soni bir necha yuz kishi atrofida boʻlgan. Tashkilotchilar Isroil tomonidan Ashdod porti orqali gumanitar yordamni yetkazish taklifini qabul qilmagan va Italiya hukumati bergan chaqiriqlarga ham eʼtibor qaratmagan.

Flotiliya toʻxtatilgandan keyin Rim va Neapolda namoyishlar boshlangan. Namoyish ishtirokchilari Italiya bosh vaziri Djordja Meloni Isroilning bu xatti-harakatlariga jim qarab turgani uchun tanqid qilmoqda.

Isroil 2007-yildan beri Gʻazoga dengiz blokadasini qoʻllab kelmoqda. Bu chora HAMASga qurol kirishini cheklash maqsadida amalga oshiriladi. Mintaqadagi vaziyat 2023-yil 7-oktyabr kuni HAMASning Isroilga yirik hujumidan soʻng yanada keskinlashdi.