Foto: AFP

Yevropa qishloq xoʻjaligi sektoridagi inqiroz sharoitida norozilik bildirgan ispan fermerlari traktorlar bilan butun mamlakat boʻylab yoʻllarni toʻsib qoʻydi.

RTVE telekanali maʼlumotlariga koʻra, mehnat sharoitlarini yaxshilash va ushbu sohadagi siyosatni oʻzgartirishni talab qilgan fermerlar Barselona, Tarragona, Kastiliya-La-Mancha, Valenciya, Aragon, La-Rioxa, Murciya va boshqa viloyatlardagi avtomagistrallarda harakatlanishni toʻsib qoʻygan.

Oʻtgan hafta Ispaniyaning uchta asosiy qishloq xoʻjaligi ittifoqi koʻplab Yevropa mamlakatlarida qishloq xoʻjaligi inqirozi tufayli oʻsib borayotgan norozilik namoyishlariga qoʻshilishlarini bildirdi. Fermerlar oʻzlarini tartibga solinmagan bozor bilan kurashishga majbur, deb hisoblaydilar. Yaʼni uchinchi mamlakatlardan past narxlarda mahsulot import qilinishi Yevropa Ittifoqi va Ispaniyada ishlab chiqarilgan mahsulotlarning marketingiga salbiy taʼsir qilmoqda.

Ularning soʻzlariga koʻra, Yevropa Ittifoqi uchinchi davlatlar bilan yangi erkin savdo bitimlarini tuzishda davom etmoqda. Bu esa butun Yevropa Ittifoqi hududidagi fermerlar va chorvadorlarning muammolarini yanada kuchaytirmoqda. Kasaba uyushmalari Janubiy Amerika davlatlari, Yangi Zelandiya, Chili, Keniya, Meksika, Hindiston va Avstraliya bilan muzokaralarni toʻxtatishni talab qilmoqda.

Bundan tashqari, ispan fermerlari Madriddan Yevropa Komissiyasi bilan birgalikda Marokash bilan chegarada nazoratni kuchaytirishni, bu mamlakatdan qishloq xoʻjaligi mahsulotlari importi Yevropa Ittifoqining ichki qoidalari va erkin savdo shartnomasida belgilangan tariflarga mos kelishini istamoqda.

Soʻnggi kunlarda Yevropa Ittifoqi mamlakatlarida fermerlarning umumevropa qishloq xoʻjaligi siyosatini oʻzgartirish, koʻplab cheklovlarni, jumladan, ekologik cheklovlarni olib tashlash va arzon xorij mahsulotlarini nazoratsiz olib kirishni toʻxtatish talablari bilan norozilik namoyishlari kuchaymoqda. Turli kasaba uyushmalari uyushmalarining taʼkidlashicha, Yevropa Ittifoqida fermerlarning ishi, shu jumladan Yevropa Komissiyasi siyosati tufayli deyarli daromadli boʻlishni toʻxtatdi.

Shu bilan birga, Yevropa Komissiyasi Ukraina tovarlarini bojsiz olib kirishni yana bir yilga, 2025-yilning iyuniga qadar uzaytirishni taklif qildi, bunga Yevropaning turli mamlakatlari qishloq xoʻjaligi ishlab chiqaruvchilari qarshi chiqdi.