Bosh prokuratura huzuridagi Departament, IIB, Milliy Gvardiyaning Ishtixon tuman boʻlimlari hamda DXXning Qoʻshrabot tumani boʻlinmasi tomonidan oʻtkazilgan tezkor tadbirda, fuqaro A.T. 5 ming AQSH dollarini fuqaro N.ga 55,5 mln. soʻmga sotgan vaqtida ashyoviy dalillar bilan ushlangan.

Shu kabi, Departament hamda IIBning Nukus tumani boʻlimlari tomonidan oʻtkazilgan tezkor tadbirda, fuqaro A.S. 2,8 ming AQSH dollarini 31,2 mln. soʻmga fuqaro S.ga sotgan vaqtida ushlanib, tadbir davomida uning yonidan jami 3 ming AQSH dollari, 34,8 ming rossiya rubli, 10 yevro, 100 BAA dinari, 5 turk lirasi va 1,2 mln soʻm ashyoviy dalil sifatida olingan.

Shuningdek, yuqoridagi fuqarolarning harakatlari boʻyicha olib borilgan tezkor kuzatuvlarda ular doimiy ravishda valyuta qimmatliklarini qonunga zid ravishda ayirboshlash faoliyati bilan shugʻullanib kelganliklari maʼlum boʻlgan.

Mazkur holatlar yuzasidan Jinoyat kodeksining 177˗moddasi (valyuta qimmatliklarini qonunga xilof ravishda olish yoki oʻtkazish) bilan jinoyat ishlari qoʻzgʻatilib, tergov haraktalari oʻtkazilmoqda.

Hurmatli fuqarolar, chet el valyutasini ayirboshlashni faqat bank muassasasi yoki uning shahobchalari orqali amalga oshirishingizni soʻrab qolamiz, bu bilan nafaqat oʻzingizni asragan boʻlasiz, balki qalbaki valyuta qimmatliklariga duch kelishni oldini olasiz.