Bosh prokuratura huzuridagi Departamentning Urganch tuman boʻlimi tomonidan oʻtkazilgan tergovga qadar tekshiruvda “Koʻmir taʼminot” MCHJning Urganch koʻmir ombori mudiri M.N. va boshqalar aholiga imtiyozli narxda koʻmir yetkazib berilganligini toʻgʻrisida soxta hujjatlarni rasmiylashtirib, 678,5 tonna koʻmirni oʻzlashtirish yoʻli bilan talon-toroj qilganliklari aniqlangan.

Departamentning Nukus shahri, Toʻrtkoʻl, Amudaryo va Qoʻngʻirot tumanlari boʻlimlari tomonidan oʻtkazilgan tergovga qadar tekshiruvlarda “Koʻmir taʼminot” MCHJning yuqoridagi shahar va tuman omborxonasi masʼul shaxslari aholiga imtiyozli narxlarda sotish uchun ajratilgan jami 435,5 tonna koʻmirni oʻzlashtirish yoʻli bilan talon-toroj qilganliklari aniqlangan.

Shu kabi, Departamentning Navoiy viloyat boshqarmasi tomonidan oʻtkazilgan tergovga qadar tekshiruvda “Koʻmir taʼminot” MCHJning Qiziltepa koʻmir ombori masʼul shaxslari 156,3 tonna koʻmirni oʻzlashtirish yoʻli bilan talon-toroj qilganliklari aniqlangan.

Mazkur holatlar yuzasidan Jinoyat kodeksining 167-moddasi (oʻzlashtirish yoki rastrata yoʻli bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishlari qoʻzgʻatilib, tergov harakatlari oʻtkazilmoqda.