Sirdaryo viloyati Ichki ishlar boshqarmasi boshligʻi lavozimiga podpolkovnik Haydarov Farrux Ubaydullayevich tayinlandi. U ushbu lavozimga qadar Oʻzbekiston Respublikasi Ichki ishlar vazirligi Akademiyasining magistratura bosqichi tinglovchisi sifatida tahsil olib kelgan.

Farrux Haydarov 1983-yilda Qozogʻiston Respublikasida tavallud topgan. 2004-yilda IIV Akademiyasini tamomlagan.

Tayinlov munosabati bilan oʻtkazilgan tadbirda viloyat hokimi, xalq deputatlari Kengashi aʼzolari, hamkor tashkilotlarning masʼul xodimlari, shahar va tuman jamoatchilik faollari hamda huquqni muhofaza qiluvchi organlarning rahbarlari ishtirok etdi.

Tadbir davomida Ichki ishlar vazirining buyrugʻiga asosan Farrux Haydarov Sirdaryo viloyati Ichki ishlar boshqarmasi boshligʻi lavozimiga rasmiy ravishda tasdiqlandi.

Majlisda Oʻzbekiston Respublikasi Prezidentining respublika miqyosida mahallalarda xavfsiz muhitni yaratish va huquqbuzarliklarning barvaqt oldini olish tizimini kuchaytirish boʻyicha qabul qilgan qarorining ijrosi atroflicha muhokama qilindi. Sohaga oid berilgan topshiriqlar yuzasidan amalga oshirilgan ishlar tanqidiy tahlil qilinib, kelgusidagi ustuvor yoʻnalishlar belgilab olindi.

Shuningdek, viloyat hududida sodir etilayotgan jinoyatchilik tahlili oʻtkazilib, kriminogen vaziyatni barqarorlashtirish masalalariga alohida eʼtibor qaratildi. Har bir shahar va tuman IIB boshliqlariga mahallalarni jinoyatchilikdan xoli hududlarga aylantirish, fuqarolar murojaatlarini oʻz vaqtida koʻrib chiqish, mavjud muammolarni aniqlash va ularni bartaraf etish boʻyicha aniq topshiriqlar berildi.