20-28-noyabr kunlari Goada 53 marotaba oʻtkazilayotgan (International Film Festival of India 53rd) Hindiston xalqaro kinofestivalida bir guruh oʻzbek kinoijodkorlar ishtirok etishmoqda.

Kuni kecha “Oʻzbekiston va Hindiston kinoijodkorlarining hamkorlikdagi loyihalari va istiqbolli rejalari” mavzusida matbuot anjumani tashkil etildi. Unda qatnashgan kinoijodkorlar kino sohasida erishilgan yutuqlar, oʻzbek va hind kinematografiyasi oʻrtasida hamkorlik aloqalarini mustahkamlash va hamkorlikda filmlar suratga olish toʻgʻrisida muhokamalar oʻtkazishdi. 

Hindistonlik kino ustalari yaqinda boʻlib oʻtgan XIV Toshkent xalqaro kinofestivali haqida ham toʻxtalib, tadbirning aʼlo darajada tashkil etilgani va bu davomiy boʻlishini bildirishdi.

Hindistonga tashrifdan asosiy maqsad oʻzaro tajriba almashish, hind kino sanʼati bilan yaqindan tanishish va kinoteatrlar faoliyatini oʻrganishdir. Shuningdek, tashrif davomida koʻplab filmlar prokati, oʻzaro almashinuvi va keng qamrovli hamkorlik yuzasidan kelishuvlar koʻzda tutilmoqda.