Illyustrativ foto

Kiyevdagi «Hilton» mehmonxonasida AQSH elchixonasi xodimi oʻlik holda topildi. Ismi oshkor etilmagan attashening (yuqori lavozimdagi shaxs yoki boshqa xizmat idoraning diplomatik yoki maʼmuriy xodimlariga biriktiriladigan diplomatik vakil) jasadi seshanba kuni topilgan. Bu haqda Ukrainaning «Strana UA» va «New Voice» axborot agentliklari xabar berdi.

AQSH Davlat departamenti matbuot kotibi Metyu Miller ham bu hodisani tasdiqladi. Uning soʻzlariga koʻra, xodim Kiyevda ishlagan va tabiiy sabablar tufayli vafot etgan.

Maʼlumotlarga koʻra, marhumning xolesterin darajasi yuqori boʻlgan. Jasadda zoʻravonlik alomatlari va hyech qanday suiqasd belgilari yoʻq. Marhum joylashgan xona ichkaridan qulflangan boʻlgan. AQSH elchixonasi vaziyatni toʻliq oʻz nazoratiga olgan va hech qanday boshqa tomonning oʻrganishiga yoʻl qoʻymayapti.

Mart oyida manbalar «Foreign Policy» jurnaliga AQSHning Kiyevdagi elchixonasiga qoʻshimcha diplomatlarni joylashtirish rejalari haqida yozgan edi. AQSHlik diplomatlar soni Ukrainada haddan tashqari koʻpayib ketgan boʻlib, hozirda 100 dan 200 ga yaqin diplomat va harbiy attashelar Kiyevda faoliyat yuritmoqda.

Avvalroq, AQSH nashri jurnalisti josuslikda ayblanib Rossiyada hibsga olinganligi haqda xabar bergan edik.