Botir MADIYOROV/«Xalq soʻzi». Dangʻara tumanida tadbirkorlik muhitini yaxshilash va shu orqali mahallalarni ishsizlikdan xoli hududga aylantirish, oilalarni doimiy daromad manbai bilan taʼminlash maqsadida keng qamrovli saʼy–harakatlar olib borilmoqda.

Ayni jarayondagi hayotbaxsh dasturlar doirasida yaqinda “Gʻumoyli” MFYda “Karobka mega global” MCHJ tomonidan 3 million dollar investitsiya jalb etilib, elektr choynaklar hamda elektr jihozlar ishlab chiqarish yoʻlga qoʻyildi. Hozirda korxonada 50 nafar mahalliy aholi vakillari muqim ish oʻrniga ega boʻldi.

— Keng assortimentdagi mahsulotlarimiz ichki bozorda tobora xaridorgir boʻlib bormoqda,—deydi korxona rahbari Rahimjon Abdullayev.—Yaqin istiqbolda xalqaro sifat sertifikatlarini qoʻlga kiritib, mahsulotlarimizni keng miqyosda eksport qilishni ham maqsad qilganmiz.

Tadbirkor navbatdagi istiqbolli biznes–rejaga koʻra, ishlab chiqarish salmogʻi va sifatini yanada oshirish harakatida. Yangi loyiha qoʻshimcha 100 ta ish oʻrni yaratish imkonini beradi.

Viloyat rahbari ushbu loyihalar bilan tanishdi. Ish oʻrinlarini koʻpaytirish, mahsulotlarning sifatini oshirish kerakligi bildirildi.