Bugun Birlashgan Arab Amirliklarining Dubay shahrida “Gulfood — 2025” xalqaro oziq-ovqat mahsulotlari va ichimliklar ko‘rgazmasi o‘z ishini boshladi.

O‘zbekiston Savdo-sanoat palatasi axborot xizmati xabariga ko‘ra, “Gulfood” dunyodagi eng yirik oziq-ovqat mahsulotlari ko‘rgazmalari qatoriga kiradi. Joriy yilda ushbu tadbir o‘zining 30-yillik yubileyini nishonlamoqda va butun dunyodan kelgan yetakchi mutaxassislar hamda xalqaro xaridorlarni g‘oyalar almashish, aloqalar o‘rnatish va strategik hamkorlikni rivojlantirish maqsadida birlashtirmoqda.

Bu yilgi ko‘rgazmada dunyoning 129 ta mamlakatlaridan jami 5 500 dan ziyod korxona ishtirok etmoqda. Tashrif buyuruvchilar soni 100 000 kishidan ortishi kutilmoqda.

O‘zbekiston Savdo-sanoat palatasi ko‘magida 25 ta korxona vakillari ko‘rgazmaning markaziy pavilonlaridan birida 102 kv. m. maydonda joylashtiriladigan “Made in Uzbekistan” milliy stend bilan qatnashmoqda.

Mazkur tadbir o‘zbek ishlab chiqaruvchilari uchun o‘z mahsulotlarini xalqaro bozorga chiqarish, yangi hamkorlik imkoniyatlarini muhokama qilish va mintaqaviy bozor rivojlanishining yangi tendensiyalari bilan tanishish uchun samarali platforma bo‘lib xizmat qiladi.

Mazkur ko‘rgazma 21-fevralga qadar davom etadi.