Foto: “The Guardian”

“Google”ning sogʻliqni saqlash va maʼlumotlar bilan shugʻullanuvchi Verily kompaniyasi Isroilda tadqiqot va ishlanmalar markazini ochganidan uch yil oʻtib, oʻz faoliyatini yakunlamoqda. Bu haqda “The Guardian” xabar berdi.

Manbaga koʻra, Xayfa va Tel-Aviv shaharlarida joylashgan “Verily” kompaniyasi xodimlari 2024-yilning uchinchi choragida ishdan boʻshatilishi kutilmoqda. Kompaniya yopilish sababini Gʻazodagi urush bilan bogʻliq emasligi, balki, oʻz strategiyasini asosiy mahsulotlar va loyihalarga qayta yoʻnaltirishga urinish sifatida baholagan.

Maʼlumot uchun, 2021-yilda “Verily” Isroilda oʻzining birinchi ilmiy-tadqiqot markazini ochdi va mahalliy kasalxonalar va sogʻliqni saqlash tashkilotlari bilan hamkorlik qilishini eʼlon qildi.

Kompaniya vakiliga koʻra, shu vaqt ichida jamoa biotibbiyot muammolarini sunʼiy intellekt yordamida hal etishga eʼtibor qaratib, muhim yangiliklar amalga oshirgan va koʻplab yutuqlarga erishgan. Uning qoʻshimcha qilishicha, kompaniya bu ishlarni kelgusida AQSHda davom ettiradi.