«Google»нинг соғлиқни сақлаш ва маълумотлар билан шуғулланувчи Verily компанияси Исроилда тадқиқот ва ишланмалар марказини очганидан уч йил ўтиб, ўз фаолиятини якунламоқда. Бу ҳақда «The Guardian» хабар берди.

Манбага кўра, Хайфа ва Тел-Авив шаҳарларида жойлашган «Verily» компанияси ходимлари 2024 йилнинг учинчи чорагида ишдан бўшатилиши кутилмоқда. Компания ёпилиш сабабини Ғазодаги уруш билан боғлиқ эмаслиги, балки, ўз стратегиясини асосий маҳсулотлар ва лойиҳаларга қайта йўналтиришга уриниш сифатида баҳолаган.

Маълумот учун, 2021 йилда «Verily» Исроилда ўзининг биринчи илмий-тадқиқот марказини очди ва маҳаллий касалхоналар ва соғлиқни сақлаш ташкилотлари билан ҳамкорлик қилишини эълон қилди.

Компания вакилига кўра, шу вақт ичида жамоа биотиббиёт муаммоларини сунъий интеллект ёрдамида ҳал этишга эътибор қаратиб, муҳим янгиликлар амалга оширган ва кўплаб ютуқларга эришган. Унинг қўшимча қилишича, компания бу ишларни келгусида АҚШда давом эттиради.