Namanganda fuqaroni toʻgʻri 3-kursga oʻqishga kiritib qoʻyishini aytgan firibgar qoʻlga olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar qildi.

Departamentning Norin tumani boʻlimi va DXX xodimlari hamkorligida oʻtkazilgan tezkor tadbirda fuqaro A.V. fuqaro J.U.ning ishonchiga kirib, uni Toshkent shahridagi xususiy universitetlardan biriga 3 kursdan oʻqishga kiritib qoʻyishi evaziga 2 000 AQSH dollarini olgan vaqtida ashyoviy dalillar bilan ushlangan.

Shu kabi boshqa bir holatda esa Departamentning Uchtepa tumani boʻlimi va DXX xodimlari hamkorligida oʻtkazilgan tezkor tadbirda fuqaro D.X. fuqaro Z.A.ning ishonchiga kirib, goʻyoki yuqori lavozimda ishlovchi tanishlari yordamida Oʻzbekiston davlat Xoreografiya akademiyasiga kirish uchun oʻtkaziladigan ijodiy imtihondan yuqori ball olib berib, davlat granti asosida oʻqishga kiritib qoʻyishi evaziga 2 000 AQSH dollarini olgan vaqtida ashyoviy dalillar bilan qoʻlga olindi.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan bilan jinoyat ishlari qoʻzgʻatilib, tergov harakatlari oʻtkazilmoqda.

Avvalroq Toshkent va Fargʻona shaharlarida OTMga noqonuniy oʻqishga kiritish holatlari aniqlangani haqida xabar qilgandik.