Foto: Reuters

Yevropa Ittifoqi savdo vazirlari 1-iyuldan boshlab Rossiya va Belarusdan gʻalla hamda boshqa qishloq xoʻjaligi mahsulotlariga taqiqlovchi tariflar joriy etishga kelishib oldilar.

Tariflar boshoqli ekinlarning bir tonnasi uchun 95 yevro, moyli oʻsimliklar uchun esa ular qiymatining 50 foizini tashkil qiladi. Shuningdek, tariflar lavlagi va quritilgan noʻxatlar uchun ham amal qiladi.

Yangi oʻzgarishlarning eʼlon qilinishi Rossiyaning noroziligiga sabab boʻldi.

«Yevropa Ittifoqining yangi xabarlari hali tahlil qilinishi kerak. Ammo ularning mafkurasi aniqki, Rossiyani hamma narsadan siqib chiqarmoqchi», — dedi Rossiya Tashqi ishlar vazirligi matbuot kotibi Mariya Zaxarova.

Yevropa Ittifoqiga raislik qilayotgan Belgiya moliya vaziri Vinsent Van Petegemning aytishicha, yangi tariflar Rossiya va Belarusdan Yevropa Ittifoqiga gʻalla importini amalda toʻxtatishga qaratilgan.

«Bu chora-tadbirlar Yevropa Ittifoqi don bozorining beqarorlashuviga yoʻl qoʻymaydi, Ukraina hududida noqonuniy oʻzlashtirgan gʻalla Rossiya eksportini toʻxtatadi va Yevropa Ittifoqiga eksportdan tushgan daromadlarini Ukrainaga qarshi bosqinchilik urushini moliyalashtirishga yoʻl qoʻymaydi», — deydi Vinsent Van Petegem.

2022-yil fevralida Rossiyaning Ukrainaga bostirib kirishi ortidan Yevropa Ittifoqining Moskvadan don importi oshgan edi. Yevropa statistika idorasi maʼlumotlariga koʻra, import 2020-yilda 120 million yevrodan 2021-yilda 290 million yevroga, 2023-yilda esa 440 million yevroga oʻsgan.