Foto: Reuters

Isroil tomonidan birinchi marta bombardimon qilingan paytda Eron yadroviy bomba yaratmagan. Bu haqda “La Nacion” gazetasi Xalqaro atom energiyasi agentligi (XAEA) bosh direktori Rafael Grossiga tayanib xabar berdi.

“Ayni paytda javob “yoʻq”. Lekin unda koʻplab elementlar bor edi, unga olib keladigan... Biz xronologik savollarga juda ehtiyotkorlik bilan yondashishimiz kerak. Iroqqa qurol ishlatish uchun 45 daqiqa kerak degan fojiali bayonot hammamiz esimizda...”, — deya tushuntirdi Grossi Eron yadroviy bomba yaratyaptimi yoki yoʻqmi, degan savolga.

Avvalroq, Rafael Grossi Isroilning Eron yadroviy inshootlariga bergan zarbalaridan keyin radiatsiya sizib chiqishi xavfi borligini aytgan edi.

Bir kun oldin, XAEA Isroilning Eronning Natanz shahridagi yadroviy inshootiga bergan zarbalaridan soʻng uranni boyitish boʻyicha yer osti zallariga taʼsir izlarini aniqlagan. Bunday xulosaga agentlik Isroilning juma kungi hujumlaridan soʻng toʻplangan yuqori aniqlikdagi sunʼiy yoʻldosh suratlari tahlili asosida kelgan. Isfaxon va Fordo hisobotlarida esa hech qanday oʻzgarishlar yoʻq.