Eron yaqin kunlarda Rossiyaga qisqa masofali “Fath-360” ballistik raketalari uchun uchirish qurilmalarini yetkazib berishga tayyorlanmoqda. Bu haqda “Reuters” agentligi Gʻarbiy xavfsizlik xodimlari va mintaqaviy rasmiylarga tayanib xabar berdi.

Ularning aytishicha, bu yetkazib berish deyarli muqarrar boʻlib, Rossiya armiyasining Ukraina bilan urushdagi imkoniyatlarini yanada kuchaytirishi kutilyapti. “Fath-360” raketalari 120 kilometrgacha boʻlgan masofadagi nishonlarga zarba bera oladi va bu ularni Ukraina chegarasiga yaqin hududlarda qoʻllash imkonini beradi.

Ushbu raketalar oʻzining yuqori aniqlik darajasi, qisqa uchish vaqti hamda minimal tayyorgarlik bilan tez ishga tushirilishi bilan ajralib turadi. Bu esa Rossiya kuchlariga tezkor hujumlar uyushtirishda muhim ustunlik beradi.

“Reuters” ekspertlariga koʻra, bu qurollar Ukraina harbiy nishonlari va infratuzilmasiga qarshi kuchli bosim sifatida xizmat qilishi mumkin. AQSH, Ukraina va Yevropa Ittifoqi rasmiylari ilgari ham Eron Rossiyaga minglab dronlar va artilleriya snaryadlarini yetkazib berganini bildirgan edi, biroq Eron va Rossiya bu ayblovlarni inkor etib kelmoqda.

2024-yil sentyabr oyida AQSH Eron raketalarni Rossiyaga toʻqqizta rus bayrogʻi ostidagi kemalar orqali yuborganini maʼlum qilgan. Biroq oʻshanda uchirish qurilmalari yetkazilmagani aytilgan edi. “Reuters” manbalariga koʻra, bu qurilmalar orqali Rossiya oʻzining ilgʻor raketalari, masalan, “Iskander”larni muhim strategik nishonlar uchun tejab qolishga erishadi.

Xalqaro strategik tadqiqotlar instituti olimi Fabian Xintsning taʼkidlashicha, “Fath-360” tizimlari ishga tushirish uchun kam vaqt talab qiladi va juda qisqa uchish masofasiga ega. Bu esa Ukrainadagi havo mudofaasining ularni aniqlab, zararsizlantirish imkoniyatini cheklaydi. Niderlandiyaning harbiy akademiyasi dotsenti Ralf Savelsberg esa bu raketalar oddiy tayyorgarlikdan oʻtgan harbiylar tomonidan ham boshqarilishi mumkinligini aytib, ularni Rossiya uchun qulay vosita sifatida baholagan.

Shunday qilib, “Fath-360” raketalari uchun uchirish qurilmalarining Rossiyaga topshirilishi Ukraina urushida kuch muvozanatini oʻzgartirib yuborishi mumkin. Bu jarayon Rossiyaning harbiy bosimini kuchaytirishi, Ukraina havo mudofaa tizimlariga ortiqcha yuk boʻlishi, shuningdek, xalqaro miqyosda Rossiya–Eron harbiy aloqalarining kuchayganidan dalolat beradi.