Markaziy bank tijorat banklari faoliyatini yanada shaffof va adolatli qilish maqsadida bank xizmatlari isteʼmolchilari bilan munosabatlarda qoʻyiladigan minimal talablarni yangiladi. Bu haqida Markaziy bankning Telegram-kanalida xabar berildi.

Unda aytilishicha, endilikda bank xizmatlari isteʼmolchilari bilan munosabatlarda qoʻyiladigan minimal talablar quyidagilar etib belgilangan:

• Yangi chek-list joriy etiladi — u orqali mijoz kredit olishdagi barcha tavakkalchilik va majburiyatlar haqida oldindan maʼlumot oladi;
• Kredit toʻlovlarini kechiktirayotgan fuqarolar uchun shartnomani oʻzgartirish va yengillik berish tartibi belgilanadi;
• Banklar fuqarolarni ortiqcha qarzga undamasligi, davlat nafaqalari hisobidan qarz undirmasligi haqidagi qoidalar kuchaytirildi;
• Mijoz roziligisiz oldindan belgilangan belgilar yoki kredit parametrlarini kiritishga yoʻl qoʻyilmaydi;
• Omonatlarni kafolatlash tizimi haqida aniq va standart maʼlumot berish majburiyati joriy etilmoqda.

Ushbu yangi normalar 2026-yilning 29-yanvar sanasidan boshlab kuchga kiradi.