Akademik Nosirov Temurjon Xayrullayevich 83 yoshida vafot etdi. Bu haqda Oʻzbekiston Respublikasi Fanlar akademiyasi matbuot xizmati xabar berdi.

Qayd etish kerakki, mashhur akademik elektroenergetik tizimlarning rejimlarini tahlili va nazariyasi boʻyicha yirik olim hisoblanardi.

“Kamtarin va samimiy olim elektroenergetik tizimlarning normal va avariya rejimlarini kompleks tahlil usullarini yaratish va umumlashtirish boʻyicha ilmiy tadqiqotlar olib borgan”, deyiladi xabarda.

Maʼlumot oʻrnida aytish mumkinki, marhum akademik 1941-yilning 25-iyulida Toshkent viloyatining Zangiota tumanida tugʻilgan.

Shuningdek, “Oʻzbekiston energomarkazi”ning bosh direktori, ToshTU energetika fakulteti professori, “Elektroenergetika” yoʻnalishining ilmiy rahbari boʻlib ishlagan. Ilmiy ishlari elektroenergetika tizimlarning turli rejimlari tahlili uchun nazariy umumlashtirilgan modellari va algoritmlariga hamda avtomatlashtirilgan dispetcherlik boshqaruvi tizimlariga bagʻishlangandi.

“Xalq soʻzi” marhumning yaqinlari, doʻstlari va shogirdlariga chuqur hamdardlik bildiradi.