Zamonaviy texnologiyalar va internet deputatlarga xalqqa yaqinroq boʻlishga, fuqarolarning fikri va ehtiyojlarini hisobga olishga qanday yordam berishi mumkin?

Toshkentda boʻlib oʻtgan Oʻzbekiston Respublikasi Oliy Majlisi Qonunchilik palatasi deputatlari uchun ikki kunlik treningda aynan shu masalalar muhokama qilindi. Tadbir YXHTning Oʻzbekistondagi loyihalar koordinatori tomonidan Jurnalistlarni qayta tayyorlash markazi bilan hamkorlikda tashkil etildi.

Treningning asosiy maqsadi parlament aʼzolariga raqamli vositalar yordamida jamoatchilik fikrini yaxshiroq tushunish, qonunlarni ishlab chiqishda fuqarolarning gʻoya va takliflarini hisobga olish, shuningdek, parlament faoliyatini ochiq va samarali muhokama qilish imkoniyatlarini taqdim etishdan iborat edi. Trening davomida ishtirokchilar oʻz matbuot xizmatlari tomonidan tayyorlangan maʼlumotlarni keng auditoriya uchun yanada tushunarli, ochiq va shaffof tarzda taqdim etish boʻyicha yangi koʻnikmalarga ega boʻldilar.

Shuningdek, trening davomida ochiq maʼlumotlar va ijtimoiy tarmoqlar fuqarolarni qaror qabul qilish jarayoniga jalb etish imkoniyatlari haqida ham soʻz yuritildi. Axborot makonini soxta xabarlar va salbiy kontentdan himoya qilish muhimligi ham taʼkidlandi. Ishtirokchilar real vaziyatlarni tahlil qildilar va dolzarb masalalar boʻyicha birgalikda yechimlar ishlab chiqish uchun amaliy mashgʻulotlarda qatnashdilar.

Mazkur tadbir kuchli fuqarolik jamiyatini shakllantirish, ochiq muloqot va inklyuzivlikni rivojlantirish yoʻlidagi muhim qadam boʻldi. Bu esa har bir inson fikri qadrlanadigan va inobatga olinadigan muhitni yaratishga xizmat qiladi.