Foto: «Халқ сўзи»

Bu haqda AOKAda oʻtkazilgan brifingda “Uzbekistan Airways” AJ axborot xizmati rahbari Kamola Ikromova maʼlum qildi.

Aviaqatnovlar Uzbekistan Airways tomonidan kechiktirilgan yoki bekor qilingan hollarda yoʻlovchilarga 2 soatdan yuqori boʻlgan kutish vaqtida suv, 4 soatdan 6 soatgacha boʻlgan kutish jarayonida issiq taom taqdim etiladi.

Agar kutish vaqti kunduzi 12 soatdan, kechasi 6 soatdan oshsa yoʻlovchilar mehmonxona hamda issiq ovqat bilan taʼminlanadi.

Noqulay ob-havo sharoiti sababli aviaqatnovlar kechiktirilgan yoki bekor qilingan hollarda esa yoʻlovchilar aviachiptalarning toʻliq qiymatini chipta sotib olingan joyda qaytarib olishlari yoki boshqa sanaga bepul qayta bronlash huquqiga ega.

Oʻzbekiston hududida amalga oshirilayotgan reyslarning uchib kelish terminali turli sabablarga koʻra oʻzgarsa, yoʻlovchilar aviakompaniya tomonidan oʻz manzillariga yer transporti orqali yetkazib qoʻyiladilar. Agar bu jarayon amalga oshirilmasa, yoʻlovchilarga aviakompaniya tomonidan aviachipta tarif turi va yetib borish manzilidan kelib chiqqan xolda 25% miqdorida kompensatsiya toʻlanadi.

Xorijiy mamlakatlardagi qoʻnish terminali oʻzgargan hollarda aviakompaniya yoʻlovchilarni oʻz manzillariga yetkazib qoʻyishga javobgar hisoblanadi.