“UzAuto Motors” AJ “Chevrolet Cobalt” avtomobilining yangi versiyalari sotuvi 2025-yil 3-noyabrdan boshlanishini eʼlon qildi.

Maʼlum qilinishicha, yangi versiyadagi avtomobillarning koʻrgazma namunalari allaqachon dilerlik markazlariga yetkazib berilgan, mijozlar ular bilan tanishib, xarid qilish toʻgʻrisida qaror qabul qilishlari mumkin.

Kompaniya “Chevrolet Cobalt” avtomobillariga boʻlgan yuqori talab va mijozlardan kelib tushayotgan koʻplab soʻrovlarni inobatga olgan holda, shuningdek, ortiqcha ajiotajning oldini olish maqsadida, mazkur avtomobillarga kontraktatsiya jarayoni onlayn tarzda amalga oshirmoqda.

Onlayn shartnoma tuzish jarayonida “Chevrolet Cobalt” avtomobillarining barcha komplektatsiyalari, shu jumladan ikkita yangi komplektatsiya ham mavjud boʻladi.

Taʼkidlanishicha, 2025-yil 3-noyabr soat 10:00 dan boshlab mijozlarga “Chevrolet Cobalt” uchun onlayn kontraktatsiya ochiladi va kompaniyaning tegishli sayti hamda “UzAvtoSavdo” ilovasi (iOS/Android) orqali amalga oshiriladi.

3-noyabr kuni barcha “Chevrolet” dilerlik markazlari yopiladi va “UzAuto Motors” savdo tizimidan uziladi.