AQSHning Nevada shtati Las-Vegas shahridagi “Trump International” mehmonxonasi yonida portlagan “Cybertruck” avtomobili haydovchisi 37 yoshli Mettyu Livelsberger portlovchi qurilma tayyorlash hamda kerakli uskunalarni sotib olish haqidagi maʼlumotlarni “ChatGPT”dan olgan, deb xabar bermoqda “NBC News” nashri.

“Sunʼiy intellektning insonga portlovchi qurilma yaratishda yordam berishi AQSH hududida birinchi marta sodir boʻlgan boʻlsa kerak”, — deydi hudud politsiyasi sherifi jurnalistlarga bergan intervyusida.

“ChatGPT” dasturi muallifi hisoblangan “OpenAI” kompaniyasi vakili sunʼiy intellekt ushbu hodisaga tayyorgarlik uchun ishlatilganidan qattiq afsusda ekanligini bildirgan.

“Biz ushbu voqeadan qaygʻudamiz. Bizning modellarimiz zararli koʻrsatmalarni rad etishga moʻljallangan. Bu holatda, «ChatGPT” Internetda allaqachon mavjud boʻlgan ochiq maʼlumotlardan foydalangan holda javob bergan», — deydi “OpenAI” vakili.

AQSHning razvedka va terrorizmga qarshi kurash boʻyicha vakili Rebekka Vayner “NBC News” telekanaliga bergan intervyusida “SI mavjud muammolarni oʻz zimmasiga oladi va bu ularga qimmatga tushadi”, deya taʼkidlab oʻtgan.