Foto: “Xalq soʻzi”

Istam Ibrohimov/“Xalq soʻzi”. Xabaringiz bor, futzal boʻyicha joriy yilda boʻlib oʻtadigan jahon chempionatiga Oʻzbekiston mezbonlik qiladi.

Eʼtiborlisi, FIFA tasnifidagi ushbu nufuzli musobaqa mamlakatimizda birinchi marta oʻtkaziladi. Binobarin, u yurtimiz sport tarixidagi muhim voqea sanaladi.

Ushbu nufuzli turnirdagi bir necha uchrashuv Buxoro shahrida qad rostlagan “Universal” sport majmuasida boʻlib oʻtishi kutilmoqda. Ayni damda bu yirik inshootda qurilish-bunyodkorlik yumushlari yakuniy bosqichda. Loyihaga muvofiq, toʻrt ming tomoshabinga moʻljallangan manej barpo etildi. Qator sport turlariga ixtisoslashgan seksiyalar, oʻquv-mashgʻulotlar zali, yuvinish-kiyinish, sport jihozlarini saqlash xonalari shay holatga keltirilmoqda. Sunʼiy qoplamali futbol maydoni ham qurilyapti. Yugurish yoʻlaklari, avtoturargoh va boshqa qulayliklar bu yerda sportning oʻndan ziyod turi bilan qishin-yozin shugʻullanish imkonini beradi.

“Universal” futzal boʻyicha jahon chempionatiga mezbonlik qilishidan tashqari, buxoroliklar hamda shahar mehmonlari bajonidil tashrif buyuradigan inshootga aylanishi kutilyapti.