Boqibegʻamga

Shukur qilolmasang, zavqlanolmasang,

Dunyoga ne uchun kelgansan axir?!

Bir sen emas, qara, tamomi banda

Hayoti goh shirin,gohida taxir...

Havas qilolmasang, shavqlanolmasang,

Gʻururingga ne deb berasan javob?

Maqsading yoʻq esa-ahvoli tangsan,

Birovlar qoʻlini aylarsan tavof.

Ilming yetishmasa, boʻlmasa kasbing,

El-ulus ne foyda topadi sendan?

Gado boʻlmagan-ku nasabing, nasling,

Nega tekinxoʻrsan tugʻilgan kundan?

Shogirding boʻlmasa, boʻlmasang ibrat,

Nomingni aytgil, kim tilga oladi?

Unutma, insondan dunyoda faqat

Ezgu ish, shogirdu farzand qoladi.

Dunyo oʻzgarmoqda, sen-oʻsha-oʻsha,

Bir qara evrilgan olam yuziga:

Shaharga aylandi qishlogʻu goʻsha,

Mehnatdan rizq topar odam oʻziga.

Qirgʻoqda oʻtirib dilni ovutma,

Hayot daryosiga urgil oʻzingni.

Gʻaflat mudrogʻidan halovat kutma,

Hayrat qamashtirsin mayli, koʻzingni.

Navoiyni oʻqi, oʻqi Bedilni,

Ilmsiz boy boʻlgan emas hech inson.

Axir Ulugʻbek ham shohligidanmas,

Ilmidan samoga qoʻygan-ku narvon.

Rizqing zamindadir, osmonda emas,

Yangi Oʻzbekiston — nasiba koni.

Olam yurtimizga qilmoqda havas,

Tillarda hurmatda hur Vatan nomi.

Sarbonga ishongan karvon qudratli,

Karvonga suyangan sarbon shavkatli.

Boshqacha boʻlishi mumkinmas, chunki

Bunday el ulugʻvor boʻlishga haqli.

                                                 Farmon TOSHEV