Bloomberg yozishicha, AQSHning soʻnggi tinchlik reja loyihasidan Rossiyaning muzlatilgan aktivlaridan 100 mlrd dollar ajratish haqida koʻzda tutilgan band olib tashlangan.

Agentlik manbalariga koʻra, ushbu bandning yoʻqotilishi Yevropa rasmiylari tomonidan ijobiy qadam sifatida baholangan.

Avvalgi taklifga koʻra, AQSH ushbu aktivlar boʻyicha foydaning 50 foizini olishi kerak edi, foydalanilmay qolgan muzlatilgan mablagʻlar esa Rossiya-Amerika investitsiya jamgʻarmasiga yoʻnaltirilishi rejalashtirilgandi.

Shu bilan birga, Yevropa Ittifoqi davlatlari muzlatilgan Rossiya aktivlaridan foydalanishning huquqiy mexanizmlarini ishlab chiqishga urinmoqda.

Avvalroq Ukraina deputati Aleksey Goncharenko AQSH taklif qilgan 28 bandlik tinchlik rejasini eʼlon qilgandi. Unda Ukrainaning NATOga kirmasligi, tinchlik bitimi imzolangach 100 kun ichida saylov oʻtkazilishi, Qrim, Lugansk va Doneskni de-fakto Rossiya hududi sifatida tan olish kabi talablar mavjud.

Keyinchalik Reuters AQSH rejasiga Yevropa ittifoqdoshlarining muqobil taklifi boʻlgan hujjatning toʻliq matnini eʼlon qilgan.