Abdulaziz YOʻLDOSHEV/“Xalq soʻzi”. Oʻzbekiston Respublikasi mustaqilligining 33 yilligi oldidan mazkur shior ostidagi maʼnaviyat festivali doirasida Samarqand viloyatida ham taniqli shoirlar, yozuvchi va olimlar, sanʼatkorlar ishtirokida ijodiy uchrashuvlar, xayriya tadbirlari, konsert dasturlari boʻlib oʻtmoqda.

Poytaxtdan kelgan targʻibotchilarning bir guruhi Pastdargʻom tumanidagi jazoni ijro etish muassasasiga bordi.

— Bu uchrashuv kutilmagan bayram tuhfasi boʻldi, — deydi jazoni oʻtayotganlardan biri. — Muassasaga Oʻzbekistonda xizmat koʻrsatgan artist Gulbahor Erqulova hamda bir guruh mashhur insonlar keldi. Ularni faqat televizor, internet orqali koʻrganman.

Festival tumandagi 125-maktabda uch avlod vakillari uchun tashkil etilgan maʼnaviy-maʼrifiy tadbir bilan davom etdi.

Nurobod tumanida ham festival doirasida “Vatan madhi” nomli konsert dasturi tashkil etildi. Tadbir ishtirokchilari “Xalqobod” mahallasida yashovchi Safarovlar xonadoniga tashrif buyurib, oilaviy yutuqlari bilan tanishishdi.

2024-yil Safarovlar oilasi uchun ulkan muvaffaqiyatli keldi. Samarqand davlat chet tillar instituti 1-bosqich talabasi Rayhona Toshmurodova Oliy taʼlim, fan va innovatsiyalar vazirligi tashabbusi bilan oʻtkazilgan “Kitobxon yoshlar ligasi” onlayn tanlovida Respublika miqyosida faxrli 2-oʻrinni qoʻlga kiritdi. Jasmina Toshmurodova Respublika Maʼnaviyat va maʼrifat markazi tomonidan Amir Temur tavalludining 688-yilligiga bagʻishlab oʻtkazilgan “Sohibqiron Amir Temur” koʻrik-tanlovida 200 mingdan ortiq bilimdonlar orasida faxrli 2-oʻrinni egalladi. Bundan tashqari, Jasmina “Zukko kitobxon” koʻrik-tanlovining 2 karra 2-oʻrin sohibasi hisoblanadi.

Axror va Sardor Toshmurodovlar ham “Besh tashabbus olimpiadasi” doirasida oʻtkazilayotgan “Zukko kitobxon” tanlovida jami 5-marta ( 3-marta 1-oʻrin, 2-marta 2-oʻrin) gʻolib va sovrindorlar qatoridan oʻrin egallagan.

Safarovlar oilasining eng kichik aʼzosi Shabnam Toshmurodova dastlab Oʻzbekiston Mahallalari uyushmasi tomonidan tashkil etilgan “Mahalladagi kitobxon” tanlovida Respublika miqyosida faxrli 1-oʻrinni egallab, Respublika gʻolibi degan sharafli nomga sazovor boʻldi. “Zukko kitobxon” koʻrik-tanlovida ham gʻoliblikni qoʻlga kiritdi.

27-iyulga qadar joylarda “Oila — maʼnaviyat qoʻrgʻoni”, “Mehr — muruvvat va saxovat uchun”, “Vatan madhi”, “Inson qadri”, “Mahallada kino”, “Zakovat” intellektual oʻyini, “Hunarmandlar va tasviriy-amaliy sanʼat koʻrgazmasi”, “Zukko Bolajon!” loyihalari hamda sport musobaqalari tashkil etiladi.