Raqobat qoʻmitasiga kelib tushgan murojaatlar orqali baʼzi BFQ mahsulotlarida dori vositasiga xos xususiyatlar mavjudligi aniqlandi. “Bio Max Pharm” MCHJ tomonidan ishlab chiqarilgan “Bio Smekta” mahsulotining qadogʻi va tarkibi dori vositasiga oʻxshashligi qayd etildi. Bu esa uning tarkibiy va sifat koʻrsatkichlari boʻyicha texnik meʼyorlarga mos kelmasligini anglatadi. Bu haqda Raqobat qoʻmitasi matbuot xizmati xabar berdi.

Qoʻmita tomonidan Oʻzbekiston akkreditatsiya markazi ishtirokida oʻrganish oʻtkazilib, “Agro Kimyo Standart” MCHJ qoshidagi “UNI-CHEM-TEST” laboratoriyasi mazkur mahsulotni texnik talablarga muvofiq deb topgani aniqlandi.

Shu sababli laboratoriyaning faoliyatiga huquqiy baho berish soʻralgan. Oktyabr oyida “Agro Kimyo Standart”ning sertifikatlashtiruvchi organi akkreditatsiya talablarini buzganligi sababli uning akkreditatsiya guvohnomasi amal qilishi toʻxtatildi.

Avvalroq, joriy yilda “Joʻrabek laboratories” MCHJ QKning arizasiga koʻra, bir qator BFQ mahsulotlarining SanPiN talablariga muvofiq emasligi aniqlangandi. “ORS”, “KIFTI”, “ORSI MAX”, “ORSASOL” va “FITA ORSA” kabi qoʻshimchalarda qonunbuzarliklar qayd etilgan va ularning ruxsatnomalari bekor qilingan. Bu choralar isteʼmolchilarni xavfli mahsulotlardan himoya qilish maqsadida amalga oshirildi.

Aytish mumkinki, ijtimoiy tarmoqlarda va OAVda dorilar oʻrnini bosadigan biologik faol qoʻshimchalarning koʻplab reklamalari aholini ularni shifokor maslahatisiz isteʼmol qilishga undamoqda. Bunday amaliyot inson salomatligiga xavf tugʻdiradi va ayrim kasalliklarni kuchaytirish xavfini oshiradi.

Eslatib oʻtish kerakki, biologik faol qoʻshimchalar davolovchi vosita sifatida tavsiya etilmaydi. Isteʼmolchilar mahsulotni sotib olishda uning sertifikatlanganligini tekshirishlari va shifokor tavsiyalariga amal qilishlari zarur. Bu salomatlikni saqlashda muhim qadam hisoblanadi.